आत्ता ससून रुग्णालयात तृतीयपंथीयांसाठी स्वतंत्र वॉर्ड
पुणे : तृतीयपंथीयांना समाजात कायम अवहेलना सोसावी लागते. त्यांना आरोग्य सुविधा देण्याबाबतही फारसे प्रयत्न केले जात नाहीत. हे चित्र सगळीकडे दिसते. या सर्व गोष्टींना छेद देत ससून सर्वोपचार रुग्णालयाने तृतीयपंथीयांसाठी स्वतंत्र वॉर्ड सुरू केला आहे. पुढील काळात इतरही रुग्णालयांकडून ससूनचे अनुकरण होण्याची शक्यता आहे.ससून रुग्णालयातील नवीन ११ मजली इमारतीत हा वॉर्ड आहे. त्याचे उद्घाटन वैद्यकीय शिक्षण मंत्री हसन मुश्रीफ यांच्या हस्ते झाले.
या वॉर्डमध्ये २४ बेड असून, दोन अतिरिक्त आयसीयू बेड आहेत. तृतीयपंथीयांवर उपचार करण्यास अनेक रुग्णालये नकार देतात. मात्र त्यांना ससूनमध्ये अतिशय सहजपणे उपचार मिळणार आहेत. या वॉर्डमधील कर्मचाऱ्यांना संवेदनशीलपणे वागण्याचे प्रशिक्षणही दिले जाणार आहे. तृतीयपंथीयांना भेडसावणाऱ्या आरोग्य समस्यांवर उपचाराची नवी दिशा ससूनमुळे खुली झाली आहे. पुढील काळात इतरही रुग्णालयांकडून ससूनचे अनुकरण होण्याची शक्यता आहे.
तृतीयपंथीयांना उपचार घेण्यास अनेक अडचणी येतात. त्याचबरोबर त्यांना आरोग्याच्या अनेक समस्या जाणवतात. आर्थिक कारणांमुळे बहुतांश तृतीयपंथीय उपचारांसाठी ससून रुग्णालयात जातात. तिथे आता त्यांच्यासाठी स्वतंत्र वॉर्ड निर्माण करण्यात आल्याने त्यांना भेदभावाची वागणूक मिळणार नाही, अशी अपेक्षा व्यक्त केली जात आहे.
मुंबईतील गोकुळदास तेजपाल रुग्णालयात पहिल्यांदा तृतीयपंथीयांसाठी स्वतंत्र वॉर्ड सुरू करण्यात आला. महाराष्ट्रातील हा पहिलाच प्रयोग होता. त्यानंतर राज्य सरकारने इतरही रुग्णालयांना याचे अनुकरण करण्याची सूचना केली होती. त्यानुसार ससून रुग्णालयाने आता पाऊल उचलत तृतीयपंथीयांसाठी स्वतंत्र वॉर्ड सुरू केला आहे.
